Канон Благовещению Пресвятой Богородицы

Канон Благовещению Пресвятой Богородицы

Песнь 1.
Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуйся, Тоя чудеса.

Припев: Пресвятая Богородице, спаси нас.

Да поет Тебе, Владычице, движа свирель духовную, Давид, праотец Твой: послушай, Дщи, радованнаго гласа от Ангела, радость бо возвещает Тебе неизглаголанную.

Вопию Тебе, веселяся, приклони ухо Твое и вонми ми, Божие возвещающу безсеменное зачатие, обрела бо еси благодать пред Богом, еяже никогдаже обрете другая, Всечистая.

Слава Отцу и Сыну и Святому Духу.

Да разумею, Ангеле, твоих глагол силу, како будет, еже рекл еси, глаголи явственнейше? Како зачну, Дева сущи, Отроковица? Како же и Мати буду Зиждителя Моего?

И ныне и присно и во веки веков. Аминь.

Лестно мя вещати помышляеши, яко мню, и радуюся, зря Твое утверждение. Дерзай, Владычице, Богу бо хотящу, удобь скончаются и преславная.

Песнь 3.
Ирмос: Твоя песнословцы, Богородице, живый и независтный Источниче, лик себе совокупльшия, духовно утверди, в Божественней Твоей славе венцев славы сподоби.

Оскуде князь от Иуды, время наста прочее, в неже явится языков надежда, Христос; ты же, како Сего рожду, Дева сущи, скажи?

Ищеши от Мене уведети, Дево, образ зачатия Твоего, но той несказанен есть: Дух же Святый, зиждительною силою осенив Тя, совершит.

Слава Отцу и Сыну и Святому Духу.

Моя прамати, приемши разум змиин, пищи Божественныя изгнана бысть, темже и Аз боюся целования страннаго твоего, стыдящися поползновения.

И ныне и присно и во веки веков. Аминь.

Божий предстатель, послан есмь Божественный поведати Тебе совет. Что мене боишися, Всенепорочная, паче Тебе боящагося? Что благоговееши мне, Владычице, Тебе честно благоговеющему?

Седален, глас 8.
Слово Божие на землю ныне сниде, Ангел предста, вопия Деве: радуйся, Благословенная, Яже печатию едина сохраншися, во утробе приемши предвечнаго Слова и Господа, да от прелести спасет, яко Бог, род человеческий.

Слава Отцу и Сыну и Святому Духу, и ныне и присно и во веки веков. Аминь.

Богородичен: Послан бысть с Небесе Архистратиг Гавриил от Бога, скоро предста ко одушевленному граду, глаголя к Ней явственно: Зиждителя приимеши, Дево, во утробе и родиши Сего непреложне с плотию. Темже послан есмь возвестити Тебе странное рождество, Чистая, и стою, зовя Тебе: радуйся, Невесто Неневестная.

Песнь 4.

Ирмос: Седяй в славе на престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Священную некую Деву раждающую слышах пророка, древле Еммануила прорекша; хощу же разумети, како Божества растворение естество человеческое претерпит?

Явила есть купина, неопальна пребывши, приемши пламень, обрадованная Всепетая, на Тебе таинства преславное: по рождестве бо пребудеши Чистая Приснодева.

Слава Отцу и Сыну и Святому Духу.

Освещаемь сиянием Бога Вседержителя, истины проповедниче, глаголи, Гаврииле, истиннейшя: како, нетление бывши чистоте Моей, Слова рожду, с плотию Безплотнаго?

И ныне и присно и во веки веков. Аминь.

Со страхом Тебе, яко раб Госпоже, предстою, с бочзнию, Отроковице, ныне смотрити стыждуся Тебе, яко бо дождь на руно, снидет на Тя Слово Отчее, яко благоволи.

Песнь 5.

Ирмос: Ужасошася всяческая о Божественней славе Твоей; Ты бо, Неискусобрачная Дево, имела еси во утробе над всеми Бога и родила еси безлетнаго Сына, всем воспевающим Тя мир подавающая.

Разумети не могу Твоих словес известия: чудеса бо быша множицею, Божественною силою чудодействуема, знамения и образы законнии, роди же дева неискусомужне никогдаже.

Дивит, Всенепорочная, и странно бо чудо Твое, едина бо Ты всех Царя приимеши во утробе, воплощаема, и Тя прообразуют пророческая речения, и гадания, и законнии образы.

Слава Отцу и Сыну и Святому Духу.

Всеми Невместимый и всеми Невидимый, како сей может во чреве девиче вселитися, еже Сам созда? Како же и зачну Бога Слова, собезначальна Отцу и Духу?

И ныне и присно и во веки веков. Аминь.

К Твоему праотцу Давиду обещався посадити от плода Твоего чрева на престоле царства его, Иаковлю Тя доброту, едину избра в словесное селение.

Песнь 6.

Ирмос: Возопи, прообразуя погребение тридневное, пророк Иона, в ките моляся: от тли избави мя, Иисусе, Царю сил.

Глагол твоих, Гаврииле, глас радованен приемши, веселия Божественнаго исполнихся: радость бо поведаеши и веселие возвещаеши безконечное.

Тебе дадеся радость, Богомати Божественная, Тебе, еже радуйся, вся тварь вопиет, Богоневесто: Ты бо едина Мати Сына Божия пронаречеся, Чистая.

Слава Отцу и Сыну и Святому Духу.

Евы Мною ныне да упразднится осуждение, да воздастся Мною долг днесь, Мною заимствование древнее да дастся преисполнено.

И ныне и присно и во веки веков. Аминь.

Обещася Бог Аврааму праотцу благословитися в семени его языком, Чистая, Тобою же конец обещание приемлет днесь.

Кондак, глас 8:
Взбранной Воеводе победительная, яко избавльшеся от злых, благодарственная восписуем Ти, раби Твои, Богородице, но, яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Икос:
Ангел предстатель с Небесе послан бысть рещи Богородице: радуйся! и со безплотным гласом воплощаема Тя зря, Господи, ужасашеся и стояше, зовый к Ней таковая: радуйся, Еюже радость возсияет; радуйся, Еюже клятва исчезнет. Радуйся, падшаго Адама воззвание; радуйся, слез Евиных избавление. Радуйся, высото неудобовосходимая человеческими помыслы; радуйся, глубино неудобозримая и Ангельскима очима. Радуйся, яко еси Царево седалище; радуйся, яко носиши носящаго вся. Радуйся, звездо, являющая Солнце; радуйся, утробо Божественнаго воплощения. Радуйся, Еюже обновляется тварь; радуйся, Еюже покланяемся Творцу. Радуйся, Невесто Неневестная.

Песнь 7.

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Свет невещественный поведая, в вещественне телеси совокупляемь за милосердие многое, светлое благовещение, Божественная проповедания, ныне взываеши Ми: благословен, Всечистая, Плод Твоего чрева.

Радуйся, Владычице Дево, радуйся, Пречистая, радуйся, приятелище Божие, радуйся, свещниче Света, Адамово воззвание, Евы избавление, горо святая, преявственное священие и чертог безсмертия.

Слава Отцу и Сыну и Святому Духу.

Душу очисти, тело освяти, церковь сотвори мя вместительну Бога, скинию Богоукрашену, одушевлен храм наитием Пресвятаго Духа и Жизни чистую Матерь.

И ныне и присно и во веки веков. Аминь.

Яко многосветлую свещу и Богоделанен чертог, вижу Тя ныне, яко злат кивот, закона Подателя приими, Богоневесто, благоизволившаго человеческое избавити Тобою тленное существо.

Песнь 8.

Ирмос: Слыши, Отроковице, Дево чистая, да речет убо Гавриил совет Вышняго древний истинный: буди к приятию готова Божию, Тобою бо Невместимый с человеки поживе. Тем и, радуяся, вопию: благословите, вся дела Господня, Господа.

Ум всяк побеждается земных, – отвеща Девица, – ищущи, яже Мне вещаеши, преславная: слышах твоя словеса, но боюся, ужасающися, да не лестию Мя, яко Еву, далече послеши от Бога. Но обаче се вопию: благословите, вся дела Господня, Господа и превозносите Его во веки.

Се Тебе недоуменное разрешися, – глаголет к сим Гавриил, – добре бо рекла, еси, вещь неудобопостижна. Словесем Твоих устен повинующися прочее, не сумнися, яко лести, якоже вещи, веруй. Аз бо, радуяся, вопию: благословите, вся дела Господня, Господа и превозносите Его во веки.

Закон сей от Бога есть человеком, – Непорочная абие глаголет, – от общия любве рождество происходит. Не вем супружника сласти всеконечно, како, убо глаголеши, яко рожду? Боюся, еда лесть глаголеши? Но обаче се вопию: благословите, вся дела Господня, Господа и превозносите Его во веки.

Слава Отцу и Сыну и Святому Духу.

Глаголы, яже мне вещаеши, Чистая, – Ангел паки глаголет, – обычая есть рождества человеков смертных, истинно Бога Тебе обещаваю, паче слова же и смысла воплощаема, яко весть, из Тебе. Темже и, радуяся, вопию: благословите, вся дела Господня, Господа и превозносите Его во веки.

И ныне и присно и во веки веков. Аминь.

Являешися Мне истины вещатель, – реча Дава, – радости бо общия пришел еси благовестник. Душу убо очистих с телом, и по глаголу твоему буди Мне, да вселится Бог в Мя, к Немуже вопию с тобою: благословите, вся дела Господня, Господа и превозносите Его во веки.

Песнь 9.

Ирмос: Яко одушевленному Божию кивоту, да никакоже коснется рука скверных. Устне же верных, Богородице, немолчно, глас Ангела воспевающе, с радостию да вопиют: радуйся, Благодатная, Господь с Тобою.

Паче смысла заченши Бога, естества обычая утаися, Отроковице, Ты бо в рождестве матерскаго избежала еса тленнаго естества и превышши сущи. Темже достойно слышиши: радуйся, Благодатная, Господь с Тобою.

Како точиши млеко, Дево Чистая, не может изрещи язык землен, странну бо естества показуеши вещь, законнаго рождества устав преходиши. Темже достойно слышиши: радуйся, Благодатная, Господь с Тобою.

Тайно во священных писаниях глаголася о Тебе, Мати Вышняго, лествицу бо древле Иаков, Тя образующую, видев, рече: степень Божия сия. Темже достойно слышиши: радуйся, Благодатная, Господь с Тобою.

Слава Отцу и Сыну и Святому Духу.

Чудное священноявленному Моисею купина и огнь показа чудо, ищай же конца в прехождении времен, во Отроковице чистей, рече, узрю. Ейже, яко Богородице, да речется: радуйся, Благодатная, Господь с Тобою.

И ныне и присно и во веки веков. Аминь.

Даниил Тя гору нарече мысленную, родительницу же Божию Исаия, видит же, яко руно, Гедеон, Давид же священие глаголет, дверь же Тя ин. Гавриил же Тебе взывает: радуйся, Благодатная, Господь с Тобою.

Светилен.
Ангельских сил Архистратиг послан бысть от Бога Вседержителя к Чистей и Деве благовестити странное и неизреченное чудо: зане Бог, яко Человек, из Ней младодействуется без семене, назидаяй весь человеческий род. Людие, благовестите обновление мира.

Слава Отцу и Сыну и Святому Духу, и ныне и присно и во веки веков. Аминь.

Богородичен: Еже от века днесь познавается таинство Божие: Бог Слово Сын Девы Марии за милосердие бывает, и радость благовещения Гавриил провещавает. С нимже возопием Ей: радуйся, Мати Господня.